Augardente Industrial VS Augardente Caseira

Dende o ano 1989 existe un consello regulador que durante os últimos anos do século XX regularía a destilación do bagazo da uva , convertendo a elaboración de augardente tradicional nunha actividade clandestina penada con multas. Aínda que a augardente se segue facendo "na casa", na actualidade non é legal comercializala antes de pasar unha serie de controis, polo que o seu uso queda restrinxido a un ámbito doméstico. Pola contra, practicamente toda a que se comercializa pertence a empresas que a producen de maneira industrial. Non é ningún segredo que existe unha clara animadversión entre os que fan a súa propia augardente na casa e os que a elaboran de xeito industrial para a súa comercialización. Os primeiros, están convencidos de que a augardente "industrial" é de moita peor calidade, pois non é o mesmo que un elabore o seu propio produto para si mesmo, que facelo por medio de ducias de traballadores para venderllo a descoñecidos. Pola contra, os empresarios e expertos din que unha augardente feita sen un control institucional pode ser perigosa para a saúde e que ademais, a calidade non pode ser mellor cando algo se realiza con menos medios dos que dispoñen alí. O que din os vellos é que aínda non morreu ninguén por beber augardente da casa. Que non leva máis que o natural. E que é máis importante compracer a un invitado cun vasiño da túa augardente que compracer a un cliente cando xa che pagou por ela.

Posiblemente sexa este un debate interminable, mais o certo é que para sair de dúbidas hai que probar a augardente duns e doutros, pero con sentidiño!